Интервју: Страхил Гавритов – Независен кандидат за Градоначалник на Радовиш

Информативниот медиум, порталот Радовиш Нјуз согласно уредувачките политики во наредниот период ќе објави интервјуа на кандидатите кои се номинирани за Локалните избори 2025.

Целта на овие интервјуа е граѓаните подобро да се запознаат со дел од нивните програми, визија и приоритети кои ќе ги понудат на овие локални избори!

Интервју со Страхил Гавритов, независен кандидат за градоначаник на Општина Радовиш

Радовиш Нјуз: Што ве мотивираше и беше предизвик да се кандидирате како кандидат за градоначалник за Општина Радовиш?

Страхил Гавритов: Мојата најголема мотивација се луѓето од целата општина и градот Радовиш. Секојдневно слушам за нивните проблеми и многу од проблемите ми се познати и што е најважно тие се решливи проблеми. Јас верувам дека со чесна работа и со вистински приоритети, можеме да изградиме поинаков Радовиш – град каде граѓаните ќе почувствуваат дека општината е на нивна страна, а не против нив. Тоа е мојот предизвик – да ја вратам довербата во локалната власт.

Радовиш Нјуз: Кои се плановите на Страхил Гавритов за иден настап на локалните избори?

Страхил Гавритов: Планот е едноставен – чесна и отворена кампања, лице в лице со граѓаните, без спектакли и празни ветувања. Ќе понудам јасна програма со конкретни мерки. Кампањата ќе биде скромна, но чесна, и тоа е најголемата разлика од политичките партии кои со години трошат милиони на кампањи.

Радовиш Нјуз: Каква е визијата на Страхил Гавритов како независен кандидат за градоначалник за Радовиш?

Страхил Гавритов: Мојата визија е Радовиш да биде општина која ќе им служи на граѓаните, а не на партиите. Сакам град во кој младите гледаат перспектива, семејствата имаат мир и сигурност, а јавните претпријатија се сервис за луѓето. Јас сакам да го гледам Радовиш како град на ред, транспарентност и правичност.

Радовиш Нјуз: Во изминатиот период имавте средби и контакти со граѓаните, дали може да ни насочите дел од проектите и идеите кои ќе бидат опфатени во Вашата програма.

Страхил Гавритов: Да, имав многу средби со граѓаните и тие средби ќе продолжат и понатаму до последниот ден од кампањата, од тие средби и разговори се обликува мојата програма.  Јас сега нема да откривам многу, но ќе кажам само едно – во неа ќе има проекти кои никој досега не ги понудил, а директно ќе го менуваат секојдневието на радовишани. Деталите ќе ги откриеме во вистинскиот момент, кога започнува и законски предвидениот рок за изборна кампања. Сакам програмата да биде изненадување кое ќе донесе надеж и ќе покаже дека Радовиш може поинаку.

Радовиш Нјуз: Врз основа на вашите анкети и предвидувања, кој е вашиот очекуван резултат за изборот на советници од советничката листа и кој резултат го очекувате како кандидат за Градоначалник.

Страхил Гавритов: Анкетите и бројките се менуваат секој ден и тоа би рекол во наша корист и од нив се гледа дека волјата на граѓаните е јасна и силна. Јас нема да шпекулирам со проценти – ќе кажам само дека нашата независна листа поддржана од граѓанската иницијатива „ГРИН“ ќе биде пријатното изненадување во Советот. А што се однесува до градоначалничката трка – убеден сум дека вториот круг е само чекор кон она што навистина доаѓа. Чувствувам дека Радовиш е подготвен за промена и знам дека победата ќе биде на страната на искреноста и независноста.