ПИПЕРКА: Зеленчук и лек!

Сега е времето на пиперките.

Тие не само што се многу вкусни, туку претставуваат и права ризница на корисни и здрави состојки (минерали, витамини, каротиноиди, флавониди). Пиперките можат да бидат благи, или толку лути што многу луѓе ги сметаат за незаменлив афродизијак.

Пиперката има разни бои и форми, а воопшто не е правило дека црвените пиперки се и најлути. Има и зелени пиперки кои се толку лути што го жарат јазикот и непцето. Лековитоста на пиперката во народната медицина никогаш не била ставена под знак прашалник. Таа е богата со минерали, витамини, посебно со витамин Ц.

Во народната медицина, пиперката се користела како антидепресив, антиреуматик, афродизијак, антисептик и диуретик.

Блага или лута

Пиперката потекнува од Јужна Америка. Шпанците ја донеле во Европа во 15-от век, од каде се проширила сè до Турција, а денес најмногу се одгледува во Унгарија.

Плодовите на пиперката ги разликуваме по форма, боја, но и по мирис и вкус.

Алкалоидот капсаицин, кој го содржи пиперката, делува антисептички, а во дигестивниот тракт го спречува развојот на бактериите на гниењето и го подобрува варењето на храната. Токму капсаицинот го дава лутиот и зачинет вкус на пиперките. Иако делува така што загрева, капсаицинот всушност го стимулира делот на мозокот задолжен за регулација на телесната температура и ја снижува. Токму поради таа причина, во тропските и суптропските краеви, луѓето консумираат „cayenne“ (вид на црвена и лута пиперка) пиперка, бидејќи им помага да полесно ги поднесат жештините.

Покрај тоа, капсаицинот има силно аналгетско дејство, кога се применува локално на кожата. Ја намалува болката така што ја уништува хемиската супстанција П, која се наоѓа во нервните клетки и која е задолжена за пренесување на чувството на болка до мозокот.

Капсаицинот го зголемува и нивото на хистаминот во крвта, кој е главен одбрамбен систем на човечкиот организам против реуматските заболувања.

Хемиски состав на пиперката

Пиперката просечно содржи околу 89% вода. Од јаглени хидрати содржи шеќери од групата на моносахариди и дисахариди. Од моносахардите, 90-98% содржи гликоза, а остатокот е фруктоза и сахароза. Количината на етеричните масла во семето на пиперката зависи од количината на присутниот алкалод – капсаицин. Капсаицинот е специфична материја и е составен дел на етеричните масла и таа ја дава лутината на плодовите на пиперката.

Витамини и минерали

Од витамини, пиперката најмногу содржи витамин Ц. Докажано е дека во пиперката има дури 4-5 пати повеќе витамин Ц отколку во лимонот и портокалот. Количината на витаминот Ц изнесува околу 100-250 mg во 100 g свежи пиперки, a неговата количина зависи од староста на пиперката.

Во пиперката има и значителни количини на витамин Б, посебно Б1(60 mg/100 g) и Б2 (30 mg/100 g свежи пиперки). Содржи и витамин Е, поради што пиперката има и антиканцерогени својства. Содржи и пантотенска киселина, а во форма на провитамин содржи и витамин А, кој е присутен како бета-каротин и криптоксантин.

Од минерали, пиперката е најбогата со калиум, фосфор и железо. Поради големата количина на витамин Ц, пиперката се препорачува во исхраната за јакнење на имунолошкиот систем.

Лековити својства

Пиперката се користи за подговтвување на салати и јадења, но и за разни пијалоци. Таа го подобрува апетитот, а при тоа и ја поттикнува работата на желудникот.

Правот од лутата црвена пиперка се користи за лечење на пореметувања во варењето и за хемороиди.

Содржи доста калиум, на кого му се препишува диуретското и антиканцерогеното дејство.

Пиперката позитивно влијае на површинската капиларна циркулација, благодарение на состојката ситрин, која влијае на елестичноста и пропустливоста на капиларите. Затоа, пиперката се користи и за лекување на атеросклероза.

Верувањето во афродизијачкото својство се темели на влијанието на пиперката на циркулацијата. Таа ја забрзува циркулацијата во телото.

Од лута пиперка во народната медицина постојат низа средства за лекување на реуматските болки. Со сок од пиперка се лечат разни воспалителни процеси, како што се воспаление на грлото или инфективни заболувања.


100 g пиперки содржат:

  • 9 mg калциум,
  • 22 mg фосфор,
  • 213 mg калиум,
  • 128 mg витамин Ц,
  • 21 калорија,
  • витамини A, Б1, Б2 и ПП

 


Полнети пиперки – јадење со мирис на спомени

Полнетите пиперки можат да бидат широки и кратки (бабури) а можат да бидат и големи и долгнавести. Иако црвените се класика, сепак можат да бидат и зелени по боја. Сите варијанти сите се неодоливо вкусни. 

 

Потребни состојки:
  • Пиперки црвени или бабури
  • Мелено месо – 400 грама (телешко, а може и мешано)
  • Ориз – 300 грама
  • Кромид – една главица
  • Сол
  • Зачин
  • Црвен пипер
  • Црн пипер
  • Зејтин
  • Сос од домати
  • Домати
  • Вода
Подготовка:

Пиперките се чистат од семките и рачките и се мијат.

На зејтин, во тенџере, се пропржува ситно исецканиот кромид. Откако малку се пропржува му се додава меленото месо, па се пржи заедно за да фино се раздроби месото. Потоа се додава оризот и се заедно уште малку се пржи. На крај се додава зачинот, сол, црвен пипер, црн пипер и смесата за полнење е готова.

Со вака подготвената смеса се полнат пиперките, отворот се затвора со округло парче домат или тенко парче компир и се редат во тавче.

Во тенџерето во кое ја подготвувавме смесата се става малку сос од домати и една чаша вода да зоврие. Со зовриената течност се полеваат пиперките и се ставаат во веќе загреана рерна на 250 степени да се печат. Се набљудуваат од време на време, но печењето трае отприлика околу еден час.

Може да се јадат и со кисело млеко или павлака (оваа комбинација е особено омилена кај децата).

 


Преземањето содржини и фотографии од порталот RadovisNews.mk значи дека давате согласност на нaведените Услови


Related Articles

Временска прогноза