СТУДЕНТИТЕ ОД АРХИТЕКТОНСКИОТ ФАКУЛТЕТ ВО ПОСЕТА НА РАДОВИШ – ЗАПОЗНАВАЊЕ СО ГРАДОТ, НЕГОВАТА ИСТОРИЈА И ИДНИОТ РАЗВОЈ

Со големо задоволство, Општина Радовиш ги пречека студентите од Архитектонскиот факултет, кои имаа можност одблиску да се запознаат со градот, неговите архитектонски вредности, реализираните проекти и плановите за неговиот иден развој.

За време на посетата, градоначалникот на Општина Радовиш, Љупче Почивалец, заедно со вработените во општинската администрација, одржа презентација пред студентите и нивните ментори, при што беа претставени развојните проекти, досегашните инфраструктурни и урбанистички активности, како и идните планови за унапредување на градскиот простор.

Посебен акцент беше ставен на развојот на Радовиш, современите архитектонски решенија и можностите за создавање пофункционална, поуредена и поатрактивна урбана средина.

Во продолжение на посетата, студентите, заедно со своите ментори и претставниците на Општина Радовиш, реализираа обиколка на позначајните знаменитости, старите градби и објекти со историска и архитектонска вредност, но и на поновите архитектонски решенија што го обликуваат современиот изглед на градот.

Посетата претставува одлична можност за студентите теоретските знаења да ги поврзат со практични примери, да се запознаат со урбаниот развој на Радовиш и да ги согледаат предизвиците и можностите во планирањето и обликувањето на градскиот простор.

Општина Радовиш и понатаму останува отворена за соработка со образовните институции и младите, поттикнувајќи размена на знаења, идеи и искуства кои можат да придонесат за одржливиот развој и подобрата иднина на градот – рече Градоначалникот Љупче Почивалец

На крајот од посетата, градоначалникот Љупче Почивалец им се заблагодари на студентите и нивните ментори за посетата, интересот и можноста за размена на идеи и искуства.

Тој изрази надеж дека токму меѓу овие млади идни архитекти ќе произлезе креативно и современо архитектонско решение за Радовиш, проект со кој градот ќе се гордее и кој ќе придонесе за неговиот понатамошен развој и препознатливост.

Посетата беше можност за студентите одблиску да се запознаат со Радовиш, но и поттик за создавање нови идеи и визии за неговата иднина.

© RadovisNews.mk, правата за текстот се на редакцијата на информативниот портал.