ВО РАДОВИШ СЛЕДНИТЕ ТРИ ДЕНА ЌЕ СЕ ЈАДАТ „САМУНИ И ТАТЛИИ“

Радовиш ќе биде домаќин на традиционалната и најмасовна манифестација „Самун ем Татлија“

И оваа година, под покровителство на Општина Радовиш, во деновите од 30 Септември до 01 и 02 Октомври, на локацијата прд Центарот за култура „Ацо Караманов“ , посетителите ќе имаат можност да уживаат во прекрасна програма исполнета со разни жанрови и содржини.

На традиционалната гурманска манифестација „Самун ем татлија“, која се одржува во Радовиш, годинава ќе настапат само македонски музичари. Како што е наведено во програмата, на 30-ти септември за дел од забавата ќе се погрижи Бајабо Бенд, Викторија Бенд и Брас Брадерс.

Наредната вечер, на први октомври ќе настапат Јовче Пандев Бенд, Игор Џамбазов и Гуру Харе и Ибишеви. Последната вечер пак, гостуваат Ицов и пријателите, Струмичка тајфа, Екстра бенд и Вукица, Троја и Влатко Стефановски Трио. Во минатото за време на манифестацијата во Радовиш најчесто доаѓаа регионални музички ѕвезди.

Црвена Јабука, Наташа Беквалац, Шабан Шаулиќ, Хари Мата Хари, Јелена Розга и многу други познати изведувачи ги забавуваа посетителите на настанот на кој се промовираат локалните специјалитети, „самунот и татлијата“ изминатите години.

Во тек на неколку дневната манифестација во минатото, се случуваше да се продадат и по 40 илјади самуни.