Средба на жени од руралните заедници со претставнички од Клубот на пратенички при Собранието на Македонија

Средба на жени од руралните заедници со претставнички од Клубот на пратенички при Собранието на Македонија

Асоцијацијата за унапредување на статусот на жената во Македонија „Женска акција“ – Радовиш, заедно со активистки од женските кружоци во Злеово и Лубница, како и претставнички на уште осум локални женски организации, на 05 декември 2025 година остварија средба со претставнички од Клубот на пратенички и Комисијата за еднакви можности при Собранието на Република Македонија.

На средбата првпат беше директно слушнат гласот на 16 жени активистки од руралните средини, кои отворено ги споделија своите искуства, проблеми и предизвици со кои секојдневно се соочуваат, но и дадоа конкретни предлози за подобрување на локалната демократија и условите за живот на жените во руралните заедници.

Присутните женски организации истакнаа дека за да се обезбеди реално и суштинско учество на жените во процесите на планирање, консултирање и донесување одлуки на локално ниво, неопходни се реформи на Законот за локална самоуправа, со воведување повеќе фазна постапка за учество на граѓаните и посебни механизми кои ќе гарантираат женско учество.

Дополнително, беше нагласена и потребата од јакнење и формализирање на месната самоуправа, преку:

• обезбедување реални просторни и финансиски ресурси,
• родово балансирано претставување,
• создавање услови жените активно да се вклучат во работата и одлучувањето во месните заедници.

Женските организации порачаа дека локалните проблеми како што се водоснабдувањето, пристапот до јавни услуги, економската активност и учеството во одлучувањето не се само локални, туку прашања од национален интерес и мора да бидат адресирани преку системски политики кои ги земаат предвид специфичните потреби на жените од руралните средини.

Преземањето содржини и фотографии од порталот RadovisNews.mk значи дека давате согласност на нaведените Услови